تورکیا سزایەكانى ئەمریكا لەسەر وڵاتەكەی بە رێزنەگرتن لە سەروەریی وڵاتەکەى لەقەڵەم دەدات، لەداهاتوودا زیانى گەورە بە پەیوەندییەكانی تورکیا وئەمەریکا دەگەیەنێت.

لەبارەی پرۆژەیاساكەی ئەنجومەنی پیرانی ئەمریكا، كە تیایدا داوای سزادانی تورکیاکراوە ، وەزارەتی دەرەوەی توركیا بەیاننامەیەكی بڵاوكردەوە و تێیدا رایگەیاندوە، پاڵنەری دەركردنی ئەو سزایەی ئەنجومەنی پیران بەهۆی ئۆپەراسیۆنی كانی ئاشتی و كڕینی سیستمی بەرگریی ئێس-400ی روسییەوە بوە، هەربۆیە ئەمریكا نیگەرانە لەوەی توركیا گورزێكی كوشندەی لە پرۆژەیەك دا، كە ماوەیەكی زۆرە كاری بۆ دەكرێت.

وەزارەتی دەرەوەی توركیا ئاماژەى بەوەکردوە ، ئەو هەنگاوانەی لەماوەی رابردودا لە كۆنگرێسی ئەمریكاوە بەرانبەر بە تورکیا گیراوتەبەر، هۆكارەكانی زیاتر ناوخۆیین. ودەشڵێت “هەنگاوی لەو شێوەیە رێزنەگرتنە لە سەروەری و بڕیارەكانی توركیا لەبارەی ئاسایشی نەتەوەییەوە، ئەمە جگەلەوەی هیچ ئەنجامێكیان نابێت و تەنها زیان بە پەیوەندییەكانی نێوان هەردوو وڵات دەگەیەنێت”.

لیژنەی پەیوەندییەكانی دەرەوەی ئەنجومەنی پیرانی ئەمریكا پرۆژەیاسایەكی پەسندكرد بۆ سزادانی توركیا بەهۆی كڕینی سیستمی بەرگریی موشەكیی ئێس-400 و هەروەها هێرشكردنە سەر باكور و خۆرهەڵاتی سوریا.