بەرشەلۆنە و ریاڵ مەدرید 9 ساڵە كلاسیكۆی وەك ئەوەی ئەمشەویان ئەنجامنەداوە،لە وەرزی 2009-2010وە نەبوە لە خاڵدا یەكسان بن و ململانێكەیان بەمجۆرەی ئێستا بێت.

یارییەكەی ئەمشەو، كە یەكەم كلاسیكۆی ئەم وەرزەی لالیگای ئیسپانییە، كاتژمێر 10 بەكاتی كوردستان لە یاریگای كامپ نو لە بەرشەلۆنە بەڕێوەدەچێت.

هەر یەكەیان 16 یارییان لە 17 هەفتەی لالیگادا كردوە و 35 خاڵیان كۆكردوەتەوە، بە جۆرێك بەرشەلۆنە 11 بردنەوە، 2 یەكسانبون، 3 دۆڕاندنی توش بوە، 43 گۆڵی كردوە و 20ی لێكراوە. هەروەها ریاڵ مەدرید 10 بردنەوە، 5 یەكسانبون و دۆڕاندنێكی هەیە. 33 گۆڵی كردوە و 12 گۆڵی لێكراوە. 

ماوەی 9 ساڵە نەبوە هەردوو جەمسەرەكەی تۆپی پێی ئیسپانیا ئاوا زۆر نزیك و هاوشێوەبن لە خولی پلە یەكی تۆپی پێی ئیسپانیادا.

لەلایەكی دیكەوە میسی بەهرەمەند و كەریم بن زیمەی هێرشبەر، لە گۆڵ كردندا هاوتەرین و یەكی 12 گۆڵیان لەم وەرزەدا تۆماركردوە، بەراوردێكی بچوك هەیە لەم نێوەندەدا، ئەویش ئەوەیە میسی یاری كەمتری كردوە و توانیویەتی لە كەمترین یاریدا بگاتە ئەو 12 گۆڵە.