لەکاتی ئابڵوقەی گەلەکۆمەکێی سوپاکانی پاشاکانی یۆنان بۆ سەر شاری ترۆی « تەروادە» و کەم بونەوەی خواردن و خواردنەوە ودەرچونی بڕیارێک لە پاشاوە کەبەشە خۆراکی ھەر خێزانێک رۆژانە بە بڕێکی کەم دیاری کرد ، گفتوگۆیەک دەکەوێتە نێوان ئەندامانی بنەماڵەی حوکمڕانی ترۆی لەسەر ئەوەی ئایا ئەوانیش وەک خەلکی ئاسایی بەشە خواردنیان بەربکەوێ یان ئەوان جیابن و وەک جاران بژین، ھەندێکیان دەڵێن پێویستە ئەو بڕیارە تەنھا گەل بگرێتەوەو شمولی ئەوان نەکات بۆ ئەوەی بەھێز بن و بتوانن بریاری باش بدەن کە بتوانێ بەرگری لەشارەکە بکات .

یەکێکیان دەڵێ لەو کاتانەی قەیران ڕوبەڕوی وڵات دەبێتەوە پاشاکان دوو جۆرن ، جۆرێکیان خۆپەرستن و خۆیان لەخەڵک جیادەکەنەوەو لە ژیانی شاھانەی خۆیان واز ناھێنن دواجار ھەم خەلک و ھەم دەسەڵاتیش لەدەست دەدەن ، جۆرێکی تر ھەن کە بڕیار دەدەن ھەمان ژیانی گەلەکەیان بژین و خۆیان جیا نەکەنەوە ، سەرەنجام سەردەکەون، ئەوان دواجار بڕیار دەدەن وەک خەلکی خۆیان بژین ، ئەوەبو توانیان بۆماوەی زیاتر لە دەساڵ بەرگریان کردو سوپای ھەموو پاشاکانی یۆنان شارەکەی پێداگیر نەکرا ، تا دواجار پەنایان بردە بەر فێڵی ئەسپە دارینەکە ، کە چیرۆکێکی بەناوبانگەو وەک پەندی لێھاتوە بەناوی « ئەسپی تەروادە یان ترۆی»
بۆیە ئێستا کاتیەتی ھەموو ئەندامانی بنەماڵە سیاسیەکان وئەندامی مەکتەب سیاسی و سەرکردایەتی حیزبەکان و وەزیرو گزیرو سەرکردایەتی و بنکردایەتیەکان ئەو ھەموو ملیارەھا دۆلارەی لە ماڵی میللەت بردویانە بیگێڕنەوەو وەک خەلک بژین
لە ئێستاشدا باشترین ھەل ھاتۆتە پێشەوە کە دادی کۆمەڵایەتی بەرقەرار بێت و ئیتر جیاوازی موچەی پلەی باڵاو پلەی تر نەمێنێ ، ئیتر کاتی ئەوە ھاتوە موچەی مامۆستاو دکتۆرێک لە موچەی وەزیر و پەرلەمانتارو حاکم و وەکیل وەزیرو راوێژکارو بەرێوەبەری گشتی زیاتر بێت
کاتی ئەوە ھاتوە کە بریار بدرێ نابێ زۆرترین مووچە لەدوو ملێۆن زیاتر بێت ، کێ پێی ناکرێ با نەیکات ھەزارەھا خەلک ھەن زۆر بەکەمترو بەشارەزایی باشتر جێگایان دەگرنەوە