جەنگی هەمەلایەنە یاخود ( Hybrid warfare ) ئەگەر هەڤالانی بسپۆری زمانەوانی ڕەخنە لە وەرگێرانەكەم نەگرن ، جەنگێكە كە ئێستا لە جیهان و بە تایبەت لە ڕۆژهەلاتی ناوەڕاستدا لە ئارادایە كە لە لایەك كۆماری ئیسلامی ئێران بە پالپشتی باسك و پرۆكسیەكانی ( بەرەی بەرگری ) و پالپشتی سێبەر و لە بەرژەوەندی ڕووسیا و چین لە لایەك و لە لایەكی دیكەش ئەمریكا و ئیسرائیل بەپالپشتی برتانیا و تا ڕادەیەك ئەوروپای رۆژئاوا سەركێشی دەكەن .

جەنگی هەمەلایەنە جەنگێكە كە لە جەنگی سەربازی ، ئابووری ، سیاسی ، دیپلۆماتیك ، جەنگی بلاو كردنەوەی دەنگۆ یاخود ( جەنگی دەروونی ) یان جەنگی سایبێری ، جەنگی دادگاكان لە ئاستی نێودەولەتی لە لایەن دەست ڕۆیشتووەكان لە ناوەندە نێودەولەتییەكان ، سیخوڕی و دەستێوەردانی كاروباری نێوخۆیی ولاتان ، فشاری كۆچبەری ، جەنگی فكری ( ئایینی ، ئۆلی ، نەتەوەیی و فەرهەنگی كۆمەلایەتی پێكدێت .

فرانك هافمەن كە داهێنەری ئەم ستراتیژییەیە پێی وابوو لە سەردەمی بەر لە جەنگی سارد شێوازی هێرش و هەرەشەكانی دوژمنان گۆرانكاری بەسەرداهاتووە . بۆ نموونە : هێرشی بەرهەلستكارە ئێرلەندییەكان لە دژی بریتانیەكان 1919 _ 1920 ، گەشەی سەربازی و مەعنەوی ئەفغانەكان لە دەیەی 1980 لە دژی سۆڤیێت ، چێچێنەكان لە 1999 _ 2009 ، ڕووداوەكانی بالكان لە دوای هەلوەشانەوەی یوگوسلاڤیا لە 1999 و هەروا ڕووداوەكانی 11ی 2001 سەپتەمبەر لە ئەمریكا .

ئەوەی ئێستا شایەتینە قۆناغێك یان زیاتر لە پێشەوەی پێشبینیەكەی ( ژێنێرال كرولاك ) لە بارەی جەنگی ( گەردەلولی بیابان ) و تێزەكەی كلاوتزویتس سەبارەت بە سێكوچكەی جەنگە . زلهێزەكان باسكەكانی خۆیان لە هەموو ئاست و ناوەند و پێگەیەك بەكار دەهێنن بۆ ئەوەی شكەست بە بەرامبەرەكەیان بهێنن . ئەوەی نامۆیە لەم ناوە گەشەی هێزی دەولەتێكە بەناوی كۆماری ئیسلامی ئێران كە زۆرێك پێیان وابوو چەند سەدەیەكە لە داكشانە و سالانێكە هیچ یەك لە زلهێزی ناوچەیی و جیهانی نەیانویست ستراتیژی خۆیان لە سەر تەریب بوون لە گەل ئەم هێزە بینا بكەن . لێرەدا توشی ( تەلەی توسیدید ) بوون . بە مانا لە سێبەری بە هەند نەگرتن و هەژمار بۆ نەكردن گەشەی كرد و پەرەی سەند و ئێستا بژاردەیەك جگە لە رووبەروو بوونەوەیان بۆ نەماوە . بەلام چۆن رووبەروو بوونەوەیەك و لەگەل كێ ؟!!!

هێزێك گەشەی كرد كە هەرسێ كوچكەكەی كلاوتزویتس ( ئاگر ، ئۆكسیژن ، سووتەمەنی )ی پێیە كە بریتین لە :

• ستراتیژی ، پلان و كارگێرییەكی دیار و بەردەوام

• هێزی مرۆیی ( لە رۆژئاوای چین تا دەریای ناوەراست و لە قەوقازیش تا باب المندب و ناوەڕاستی ” پرۆكسیەكان ” )

• هێزی سەربازی و سوپا كە پڕچەكە بە تەكنۆلۆژیایەك بە كاراییەكی بەرز و تێچوویەكی كەم

ئەمریكا و ڕۆژئاواییەكان پێیان وابوو سەرەڕای هۆشدارییەكانی ئیسرائیل و بەتایبەت نێتانیاهو لە دانووستاندنەكانی 5+1 لە دەیەی ڕابردوو توانیویانە كۆماری ئیسلامی ئێران كۆنترۆل بكەن ، بەلام لە بەرامبەردا ئەوە ئێران بوو كە توانی لە سێبەردا نە تەنها لە عێراق بەلكوو لە ڕۆژهەلاتی ناوەڕاست بەگشتی بەڕی حكومداری لە ژێر پێی ئەوان هەڵتەكێنێ .

بەلگەش لەسەر قسەكانم شۆكە یەك لە دوای یەكەكانی گۆڕانكارییەكانە لە :

1 _ جەنگی ڕووسیا و ئۆكرانیا و كاریگەری تەكنۆلۆژیای جەنگی ئێرانی لە ئۆدێسای ئۆكرانیا بە تایبەت و لە بەرەكانی شەر بە گشتی ( مێژووی درۆنەكانی ئێرانی شاهێد و موهاجر 1985 تا ئەندازیاری پێچەوانەی درۆنی QM_1 ی ئەمریكی بە ناوی كەمان _ 2 )

2 _ ڕووداوەكانی 7ی ئؤكتۆبەر لە نێوان حەماس و ئیسرائیل ( شێوازی هێرش و بەرگری حەماس لە ڕووی هەماهەنگی و پالپشتی لۆژێستیك و كارگێری مەیدانی و بەكارهێنانی تەكنۆلۆژیای سەردەم و لە هەمووی گرنگتر هێزی هەوالگەری و سیخوڕی كە تا ئەو ساتەش هەمووانی دووچاری شۆك كردووە )

3 _ دۆخی ئێستای دەریای سوور و باب المندب و ڕۆل و هەلوێستی حوسیەكان لە فراوان كردنی بەرەكانی شەر

4 _ هێرش و هەرەشەكانی پرۆكسیەكانی ئێران لە عێراق و سووریا و باشووری لوبنان بۆ سەر بنكە بارەگاكانی هێزەكانی ئەمریكا

5 _ پەیوەندییەكانی ولاتانی عەرەبی كەنداو لە گەل ئێران

6 _ دۆخی نەوت و ووزەی جیهانی لە ئۆپێك پلاس

بەم زووانەش دوور نیە لە قەوقازیش شایەتی سورپرایزی نوێ لە لایەن ئێران و بەرەی بەرگری بین .

هەموو ئەمانە گوزارشت لە گۆرانكاری ڕیشەیی لە هاوكێشەی هێزە لە جیهان كە بەڕای من لە 7ی ئۆكتۆبەر لە دایك بووە و دەبێت هەمووان لە سەر نەخشەیەكی نوێ مامەلەی لە گەل بكەن .