بڕیارە ئەمڕۆ دادگای باڵای فیدراڵی عیراق لە سەر سکاڵایەکی تایبەت بە ئەنجامەکانی هەڵبژاردنی ئەنجوومەنی پارێزگای کەرکووک كۆببێتەوە كە داوای هەڵوەشاندنەوەی ئەنجامی هەڵبژاردنەکە دەکرێت.
بەپێی خشتەی دانیشتنەکانی دادگای فیدراڵی، ئەمڕۆ دووشەممە، دادگای فیدڕاڵی لەسەر سێ سکاڵای تایبەت بە کەرکوک کۆدەبێتەوە، سکاڵای یەکەم لەلایەن ئەمیل بەتریس، کاندیدی کۆتای مەسیحییەکان و سکاڵای دووەم لەلایەن محەمەد مەھدی، سەرۆکی ھاوپەیمانی کەرکوکمان تۆمارکراون.
سکاڵاکاران داوادەکەن ئەنجامی ھەڵبژاردنی ئەنجومەنی پارێزگای کەرکوک ھەڵبوەشێتەوە بە پاساوی ئەوەی کۆمیسیۆن ھەڵنەستاوە بە وردبینی کردن لە تۆماری دەنگدەراندا بە پێی ماددەی ١٣ی یاسای ٤ی ساڵی ٢٠٢٣ی ھەمواری سێیەمی یاسای ھەڵبژاردنی ئەنجومەنی نوێنەران و پارێزگاکان.
سکاڵای سێیەم لەلایەن حەسەن توران، سەرۆکی بەرەی تورکمانیەوە تۆمارکراوە کە تێیدا داوایکردووە وردبینی لە تۆماری دەنگدەرانی کەرکوک بکرێت پێش ھەڵبژاردنی داھاتووی ئەنجومەنی نوێنەران.
