وەزارەتی تەندروستی هەرێم هۆشداری دەدات لەبارەی بەكار‌هێنانی دەرمانەكانی گەورەكردنی ئەندامەكانی جەستەی ژنان و پیاوان و چەند دەرمانێكی دیكە و دەڵێت لێكەوتی مەترسیدار لەسەر ئەندامەكانی لەش جێدەهێڵن.
كۆنتڕۆڵی جۆریی دەرمان لە وەزارەتی تەندروستیی هەرێم لە راگەیەنراوێكدا ئاماژەی بۆ ئەوەكردووە، هاووڵاتییان ئاگاداری بەرهەمی ساختە بن كە لە تۆڕە كۆمەڵایەتییەكان و دوكانەكانی فرۆشتنی بەناو گیادەرمان، بەردەوام بانگەشەی هەڵە و چەواشەكارانە بۆ مەبەستی چارەسەركردن و كەمكردنەوە یان رێگریكردن لە نەخۆشی بۆ كۆمەڵێك بەرهەمدەكرێت، لەكاتێكـدا ئەو بەرهەمانە بەپێی پێوەرە زانستییەكانی رێكخستنە دەرمانسازییەكان رێگەپێدراو نین.
راشیگەیاندووە، ئەو بەرهەمانەی بەردەوام ریكلام و بانگەشەی پەسەندنەكراو و درۆینەی وەك چارەسەركردنی نەخۆشیی شەكرە و قەڵەوی و كێش كەمی و گەورەكردنی ئەندامەكانی جەستەی ژنان و پیاوان و لاوازیی سێكسی لە تۆڕە كۆمەڵایەتییەكان بۆدەكرێت، بەپێی راپۆرتی هەڵسەنگاندن و شیكردنەوەی تاقیگەیی دامەزراوە گەورەكانی دەرمان، ئەو بەرهەمانە مەترسیدارن، چونكە ماددە و دەرمانی شاراوە یان قەدەغەكراویان بەبڕی زۆر تێدایە، سەرجەمیشیان لێكەوتی مەترسیداری تەندروستی لەسەر ئەندامەكانی لەش جێدەهێڵن.
داواشدەكات هاووڵاتییان تەنیا ئەو دەرمانانە بەكاربهێنن كە ستیكەری كۆنتڕۆڵی جۆریی دەرمانیان لەسەرە.
