دوێنێ، چوار شەممە، ٣١/٧/٢٠٢٤، لە شاری ساوثپۆرتی بەریتانیا، نارەزایەتیەكی فراوان ئەنجام درا و ئاژاوە و بریندار بوونی لێ كەوتەوە.
دانیار ئەكرەم، چالاكوان، بە وڵات میدیای وت: كاتێك بە ڕێگاوە بووم و پیاسەم دەکرد بینیم ژمارەیەكی زۆر هاوڵاتی لەگەڵ پۆلیس كەوتونەتە شەڕ و پێكدادان و شەقامەكانیش بە تەواوی پیس ببوون، لەوێ چەند گرتە ڤیدیۆیەكم بۆ سایتی وڵات میدیا، تۆمار كرد، بەڵام بارودۆخەكە زۆر خراپ بوو بۆیە كشامەوە.
دانیار ئەكرەم، دەشڵێت: ئاژاوەكە دوای ئەوەهات كە شەوی سێ شەممە، ٣٠/٧/٢٠٢٤، لە شارەكەماندا كەسێك بە چەقۆ هێرش دەكاتە سەر ژمارەیەك منداڵ لە پۆلێكی سەمای تایلۆر سویفت و سێ كچی منداڵ سەر دەبڕێت و چەند كچێكی بچوكیش بریندار دەكات.
سەبارەت بە نارەزایەتیەكە، دانیار ئاشكرای كرد كە بەپێی زانیاریەكان، زیاتر لە ٥٠ پۆلیس بریندار بوون و ژمارەیەكیش لە ئۆتۆمبێلەكانی پۆلیس شكێندراون و نزیكەی ١٠٠ كەسیش دەستگیركراون.
