کۆمسیۆنی باڵای سەربەخۆی هەڵبژاردنەکانی عێراق لە ڕێگەی نووسراوی فەرمی ژمارە ٩٥٧ لە ڕێکەوتی ١٣ی نیسانی ٢٠٢٥دا، وەڵامی نووسراوی ژمارە ١٣ی بزووتنەوەی گۆڕان (باڵی گەڕەکی کوردسات)ی داوەتەوە و داواکارییەکەیان بۆ بەستنی کۆنگرە ڕەتکردووەتەوە.
لە نووسراوەکەدا، کۆمسیۆن چەند هۆکارێکی دیاریکردووە بۆ ڕەتکردنەوەی داواکارییەکە:
یەکەم: بەپێی بڕیاری ئەنجوومەنی کۆمسیاران ژمارە (١)ی کۆنووسی نائاسایی ژمارە (٤٨) لە ١١/٩/٢٠٢٤، ماوەی دەسەڵاتی ڕێکخەری گشتی (عومەر عەلی حسێن) و خانەی ڕاپەڕاندن تەنها بۆ ٦ مانگ بووە و لە ١١/٣/٢٠٢٥ کۆتایی هاتووە. داواکارییەکە لە ٢٤/٣/٢٠٢٥ پێشکەش کراوە، واتە دوای بەسەرچوونی ماوەی دەسەڵاتی ڕێکخەری گشتی.
دووەم: داواکارییەکە ناوی “بەستنی کۆنگرە”ی هەڵگرتووە، بەڵام لە ناوەڕۆکدا هیچ کات و شوێنێکی دیاریکراوی بۆ بەستنی کۆنگرەکە تێدا نییە، کە ئەمەش پێچەوانەی بڕیارەکانی ئەنجوومەنە.
سێیەم: ئەو دەستلەکارکێشانەوانەی کە لەلایەن دانا ئەحمەد مەجید، بریکاری ڕێکخەری گشتی ماوەبەسەرچوو پێشکەش کراون، پێویستە بە داواکاری تاکەکەسی خۆیان و هاوپێچکردنی کارتی نیشتمانی پێشکەش بکرێن بۆ وردبینیکردن و پشتڕاستکردنەوە.
کۆمسیۆن ڕاشیگەیاندووە کە لەبەر ئەم هۆکارانە، ڕەزامەندی نادرێت لەسەر داواکارییەکە، چونکە پێچەوانەی یاسای پارتە سیاسییەکان و بڕیارەکانی ئەنجوومەنی کۆمسیارانە.
