ئەسعەد شەیبانی، وەزیری دەرەوەی سوریا، ئەمرۆ سێشەممە ستایشی بڕیاری دۆناڵد ترەمپی کرد بۆ هەڵگرتنی گەمارۆکان لەسەر سوریا، و وەک “خاڵێکی وەرچەرخانی گرنگ بۆ گەلی سوریا” پێناسەی کرد.

شەیبانی بە ئاژانسی “ڕۆیتەرز”ی ڕاگەیاند: “ڕاگەیاندنەکەی ترەمپ ئاماژەیە بۆ خاڵێکی وەرچەرخانی گرنگ بۆ گەلی سوریا دوای شەڕێکی وێرانکەر بۆ ماوەی چەندین ساڵ”. ئەو ئاماژەی بەوەش کرد کە سوریا بە ئەرێنییەکی زۆرەوە دەڕوانێتە ڕاگەیاندنەکەی ترەمپ.

هەروەها زیادی کرد: “سوریا ئامادەیە پەیوەندییەکانی لەگەڵ ئەمریکا بەهێز بکات لەسەر بنەمای ڕێزگرتن و متمانەی دووقۆڵی و بەرژەوەندییە هاوبەشەکان”. ئەو هەروەها وتی: “ترەمپ دەتوانێت ڕێککەوتنێکی ئاشتی مێژوویی بەدەست بهێنێت و سەرکەوتن بۆ بەرژەوەندییەکانی ئەمریکا لە سوریا بەدەست بهێنێت”.

ترەمپ: سزاکانی سوریا هەڵگیران

ترەمپ ئەمرۆ سێشەممە لە بەردەم فۆرۆمی وەبەرهێنانی سعودی-ئەمریکی وتی کە گەمارۆکان لەسەر سوریا هەڵدەگرێت تاوەکو “دەرفەتی گەشەکردنی” پێ ببەخشێت.

ئەو زیادی کرد: “ئەو گەمارۆیانە ئابووری سوریایان ئیفلیج کردبوو و پێشتر پێویست بوون، بەڵام ئێستا کاتی ئەوە هاتووە کە سوریا بدرەوشێتەوە”.

هەروەها وتی: “خۆشحاڵم ڕابگەیەنم کە مارکۆ ڕۆبیۆ (وەزیری دەرەوەی ئەمریکا) لەم هەفتەیەدا چاوی بە هاوتا سورییەکەی دەکەوێت”.

ئەو درێژەی دا: “ئیدارەکەم هەنگاوی یەکەمی ناوە بۆ ئاساییکردنەوەی پەیوەندییەکان لەگەڵ سوریا”.

ئەو جەختی کردەوە: “حکومەتێکی نوێ هەیە کە هیوادارین سەرکەوتوو بێت… دەڵێم بەخت یاوەرت بێت ئەی سوریا. شتێکی تایبەتمان پیشان بدەن”.

ئاژانسی “ڕۆیتەرز” لە زاری بەرپرسێکی کۆشکی سپی ڕایگەیاند کە سەرۆکی ئەمریکا دۆناڵد تراەمپ سبەینێ چوارشەممە چاوی بە سەرۆکی سوریا ئەحمەد شەرع دەکەوێت.

سوریا هەوڵ دەدات گەمارۆ ئەمریکییەکان سووک بکات، کە وڵاتەکەی لە سیستەمی دارایی جیهانی دابڕیوە و چاکبوونەوەی ئابووری دوای 14 ساڵ شەڕی ماڵوێرانکەر زۆر سەخت کردووە.