ئەمڕۆ چوارشەممە، حکومەتی عێراق لە بەیاننامەیەکدا بە توندی ئیدانەی گەمارۆی سەر کەرتی غەززەی کرد و بە “وەحشیانە” وەسفی کرد. هاوکات داوای کرد دەستبەجێ سیاسەتی برسیکردنی خەڵکی فەڵەستین ڕابگیرێت و ڕێگە بە گەیاندنی هاوکارییە مرۆییەکان بدرێت.
باسم عەوادی، وتەبێژی فەرمیی حکومەتی عێراق، ڕایگەیاند: “ئەم گەمارۆیە بەشێکە لە سیاسەتێکی سیستماتیک و نامرۆڤانە بۆ برسیکردنی خوشک و برا فەڵەستینییەکانمان.”
عەوادی ئاماژەی بە دیمەنە دڵتەزێنەکانی ئەو منداڵە برسیانە کرد کە بۆ وەرگرتنی پارووە نانێک لە ڕیزدا وەستاون، هەروەها ئەو پاڵەپەستۆ و قەرەباڵغییەی لەبەردەم بارهەڵگری هاوکارییەکاندا دروست دەبێت، کە بوونەتە “تەڵەی مەرگ” و لەلایەن هێزەکانی ئیسرائیلەوە بۆ کوشتنی خەڵک بەکاردەهێنرێن.
وتەبێژی حکومەت جەختیشی کردەوە کە ئەم دۆخە “تاقیکردنەوەیەکی ڕاستەقینەیە” بۆ وڵاتە زلهێزەکان و ڕێکخراوە نێودەوڵەتییەکان تاوەکو بەرگری لە مافەکانی مرۆڤ و کەرامەتی مرۆڤایەتی بکەن.
لە کۆتاییدا، حکومەتی عێراق داوای کرد فشار بخرێتە سەر بەرپرسانی ئیسرائیل بۆ ئەوەی بەپەلە ڕێگە بە گەیشتنی هاوکارییە فریاگوزارییەکان بە خەڵکی غەززە بدەن.
