نووسینی: ئاریان محەمەد
گوزارەی “ئاوایە سەرۆكەكەی”، تەنها دەستەواژەی نێو كلیپێكی هەڵبژاردن و بازاڕگەری رۆژگاری هەڵمەتی بانگەشە نەبوو بۆ وێناكردنی بافڵ جەلال تاڵەبانی وەك سەرۆكێكی ئازا، بەڵكو رەنگدانەوەی دەستپێكردنی رۆژگار و سەردەمی سەركردەیەكیشە كە دەتوانێ بە ئازاییەوە بیر بكاتەوە و بە ئازاییش بڕیار بدات و ئازاتریش جێبەجێی بكات، ئەم هەموو بوێری و كەڵەگەتە سیاسییە ئەگەر بەدیوێكدا بۆ سەنگی سایكۆلۆژیای خودی بافڵ جەلال تاڵەبانی بگەڕێتەوە لە پڕۆسەی بڕیاردان، ئەوە دیوەكەی دیكەی روون و رۆشنە كە پەیوەستە بە یەكانگیریی ناوخۆیی و یەكدەستی سەركردایەتییەوە، كە هەرگیز ئەو تیمە پەسەندە بۆ چاكەی حزبی و رێكخراوەیی (نەخێر) ناخەنە ناو دانیشتن و سەرمێزی گفتوگۆكانەوە.
گۆڕانكارییە ناوخۆییەكانی یەكێتی وا دەكەونە سەرپێ و جێبەجێكردنیان خاوە خاویان پێناكرێت، حزب بۆ ئەوەی چانسی مانەوە و گەشەكردنی هەبێت تەنها دوو بژاردەی لەبەردەمدایە و لەوە زیاتر نییە، یان دەبێت دۆگمایی بیر و ئەندێشە و ئێكسپایەربوونی میكانیزم و رێكارەكان بەرەو مەرگ و پوكانەوەی ببات و كاریگەرییەكانی نەهێڵێت یانیش پێش زەمەن و روداوەكان بكەوێت و بە ڤێرژنی نوێی خۆی ئەپدەیت بكاتەوە، لەمەدا یەكێتی هەر دەبێت پەسنی بژاردەی دووەم بكات و لە پێناو فەرمایشتەكانی مام جەلال ـ ی رابەر و بڕیارەكانی سەرۆك بافڵ جەلال تاڵەبانی بۆ مانەوە و گەشەكردن رێگا راستەكە هەڵبژێرێت.
رەگەزەكانی گۆڕانكاریی و پایەكانی خۆنوێكردنەوە زۆرن، وەلێ ئۆرگان وەك یەكەی سیاسی و رێكخراوەیی و كادریش وەك سەرچاوەی مرۆیی لەو پڕۆسەیەدا لە هەموو شت گرنگترن، پێشتر تێگەیشتنە باوەكە وابووە كەمكردنەوە و یەكخستنەوەی ئۆرگان هاوتا بێت بە كەمكردنەوە و لەكارخستنی كادر و هاوكات جێكردنەوەی زۆرترین سەرچاوەی مرۆیی لە شوێنێكدا مانای ئەوەی پێبدرێت كە رۆژگاری نەوەیەك لە تێكۆشەر بەسەر چووە، بەڵام راستییەكەی پڕۆسەكە خۆی راستكردنەوەی بارێكی لاری زۆری لە بەرهەم و خراپی دابەشكردنە و بنەبڕكردنی بێكارییەكی روپۆشكراوە، بۆ ئەمەش دڵنیاییەكەی سەرۆك بافڵ جەلال تاڵەبانی روون و راشكاو بوو، كە یەكێتی لەسایەی ئەو گۆڕانكارییانەوە پارێزگاری لە پێگەی هەمووان دەكات و سەرلەنوێ یەكێتییەكان بۆ كاری گەورەتر ئەركدار دەكرێنەوە.
پەیوەندی كادر لەگەڵ هەر پارتێكی سیاسی، جگە لە باوەڕ و دیدگای هاوبەش بۆ داهاتوو، ئەرك و ماف پێكیان دەبەستێتەوە، ئەركی گەورە و رۆڵی كارا و دەرفەت بۆ دەرخستنی تواناكان هەر بەوە بەدی دێت، كە لە پڕۆسەیەكی گۆڕانكاریی هەمەلایەنە هەموو هەڤاڵێك بۆ سەردەم و قۆناغێكی نوێ ئەركدار بكرێتەوە و دەرگای كاركردن بە رویدا دانەخرێت، بەمەش دەتوانرێت پارێزگاریی لە پێگە و مافەكانی بكات و ببێتە بكەرێكی بەسوود لە ژیانی سیاسیدا، هەر ئەمەشە كە ئێستا بافڵ جەلال تاڵەبانی كردویەتی بە كردار.
