سەرۆكایەتی شارەوانی سلێمانی روونكردنەوەیەك لەبارەی تیروپشكی ئەلیكترۆنی بۆ دابەشكردنی زەویی فەرمانبەران بڵاودەكاتەوە و رایدەگەیەنێت: هێشتا زەویی ترمان ماوە كە وەك وەجبەی سێیەم بەسەر فەرمانبەران دابەشیان دەكەین.
لەو روونكردنەوەیەدا كە ئەمڕۆ پێنجشەممە 28-8-2025 بڵاویكردووەتەوە، سەرۆكایەتی شارەوانی سلێمانی ئاماژەی بەوەكردووە كە لە روانگەی یاساییەوە ناتوانن هیچ دەستكارییەكی ئەو لیستە بكەن كە لەلایەن لیژنەی باڵاوە پەسەندكراوە و تەنانەت ئەگەر هەمان فەرمانبەریش دووجار ناوی هاتبێ، شارەوانی ناتوانیێت یەكێك لە دوو ناوەكە لە تیروپشك دووربخاتەوە.
دەقی روونكردنەوەكە:
روونكردنەوەیەك لەسەر تیروپشكی ئەلیكترۆنی بۆ دابەشكردنی زەویی فەرمانبەران:
پاش بڵاوكردنەوەی ناوی ئەو فەرمانبەرانەی كە ئەمڕۆ لە تیروپشكێكی ئەلیكترۆنیدا زەوییان بەسەر دابەشكرا هەندێ پرسیار لای فەرمانبەرە بەڕێزەكان دروستبووە و بە پێویستمان زانی لێرەوە روونكردنەوەی لەسەر بدەین:
سەرەتا هەروەك پێشتر رامانگەیاندبوو كە ژمارەی ئەو فەرمانبەرانەی رەزامەندییان هەیە بۆ وەرگرتنی زەوی لە سلێمانیدا زۆر زیاترە لەو زەوییانەی كە لە ناو سنووری شارەوانیماندا بەردەستن بۆ دابەشكردن، بۆیە لەسەر بنەمای ریزبەندیی لیستی پەسەندكراو لەلایەن لیژنەی باڵای دابەشكردنی زەوییەوە و فەرمانبەرانی هەموو وەزارەتە جیاوازەكانمان بۆ تیروپشكی ئەلیكترۆنی داناوە لە هەر سێ سێكتەرەكەدا، واتە هیچ سێكتەرێك بۆ وەزارەتێكی دیاریكراو تەرخان نەكراوە، بەڵكو دەشێت لە هەمان فەرمانگەدا فەرمانبەرێك لە سێكتەری لاوان زەوی وەربگرێت بەڵام فەرمانبەرێكی تر لە سێكتەری فەرمانبەران زەوی وەربگرێت، ئەمەش بۆ دابینكردنی دادپەروەرییە لە تیروپشكەكەدا.
وە ئەمە دوا وەجبەی دابەشكردنی زەوی نییە لە سنووری ئێستای شارەوانیماندا، بەڵكو هێشتا زەویی ترمان ماوە كە وەك وەجبەی سێیەم بەسەر فەرمانبەران دابەشیان دەكەین و بۆ ئەو مەبەستەش داواكارین لە فەرمانگە پەیوەندارەكان كە وەك پێویست بەدەم پرۆسەكەوە بچن و هاوكارمان بن لەوەی لە ئایندەیەكی نزیكدا وەجبەی سێیەمی دابەشكردنی زەوی رابگەیەنین.
لە ئەنجامی تیروپشكەكەدا كۆمەڵێك ناوی دووبارە و سێبارە لە لیستەكەدا دەركەوتن كە ژمارەیان نزیكەی ٥٠ ناوە لەكۆی نزیكەی ١٨ هەزار ناو، وە پاش بەدواداچوونی بابەتەكە بۆمان دەركەوت كە سەرجەم ئەو ناوانە لە لیستە پەسەندكراوەكەی لیژنەی باڵادا زنجیرەی جیاوازیان هەیە، ئەمەش دەیسەلمێنێت كە سەرجەم ئەو ناوە دووبارانە كەسی جیاوازن بەڵام ناویان لەیەكدەچێت، بۆ نموونە: بەشێك لەو ناوانە وەزارەتیان جیاوازە، وە هەندێكی تریان لە هەمان وەزارەتن بەڵام فەرمانگەیان جیاوازە، وە هەندێكیان لە هەمان فەرمانگەشن بەڵام شوێنی نیشتەجێبوون و باری شارستانییان جیاوازە، ئەمە وێڕای ئەوەی لە روانگەی یاساییەوە شارەوانیمان ناتوانێت هیچ دەستكارییەكی ئەو لیستە بكات كە لەلایەن لیژنەی باڵاوە پەسەندكراوە و تەنانەت ئەگەر هەمان فەرمانبەریش دووجار ناوی هاتبێ ئێمە ناتوانین یەكێك لە دوو ناوەكە لە تیروپشك دووربخەینەوە، بەڵام دواتر سەرجەم ئەم فەرمانبەرانەی زەوییان بۆ دەرچووە داوای بەڵگەنامەكانیان لێ دەكرێ و لێوردبوونەوەی تریان بۆ دەكرێت، بۆیە فەرمانبەران دڵنیادەكەینەوە لەوەی كە رێگەنادەین هیچ فەرمانبەرێك دوو زەوی وەربگرێت.
بەرنامە ئەلیكترۆنییەكە بە هەڕەمەكی ناوەكان بۆ زەوییەكان دادەنێت بۆیە ئێمە كتومت ئەوەمان بڵاوكردووەتەوە كە بەرنامەكە دایناوە و لەبەرئەوەشە كە ناوەكان بە ریزبەندیی ئەبجەدی نییە، بەڵام شارەوانیمان ناوەكانی بە فایلی ئیمەیج (وێنە) دانەناوە بەڵكو بە فایلی (PDF) بڵاومان كردووەتەوە و ئاشكرایە كە لە فایلی PDFدا تایبەتمەندیی گەڕان (سێرچ) هەیە و هەموو فەرمانبەرێك دەتوانێت لە مۆبایلەكەی خۆیەوە گەڕان بۆ ناوەكەی خۆی بكات.
هەروەها شوێنی ئەو سێ سێكتەرە بەم شێوازەی خوارەوەیە:
سێكتەری لاوان لە بەشێك لەم كەرتەكانە پێكهاتووە:
بەردەكەڕ
چەقڵاوە
سەدوبیست
زڕگوێز
سەماوات
ناوگردان
سێكتەری فەرمانبەران لە بەشێك لەم كەرتانە پێكهاتووە:
كەڵەوانان
چەقژ
قایكند
دارتووی مەولانا
كانی مەندەم
قەمەرتلێ
سورگا
كەندەكەوە
سێكتەری سۆتكە لە بەشێك لەم كەرتانە پێكهاتووە:
سۆتكە
سورگا
قولەرەیسی
سەرۆكایەتیی شارەوانیی سلێمانی
