شاندی ئیمراڵی رایگەیاند، ئۆجەلان لە دیدارەکەی رۆژی پێنجشەممەدا گوتوویەتی، ئامانجیان کۆتاییهێنانە بە قۆناغی ئازار و بۆ ئەوەش هەرکارێکیان لەدەستبێت ئەنجامیدەدەن.

رۆژی پێنجشەممە 28ـى ئاب، شاندی ئیمراڵی کە پێکهاتبوو لە پەروین بوڵدان، میتحات سانجار و ئۆزگور فایەق ئەرۆڵ، بۆ هەشتەمین جار، سەردانی دوورگەی ئیمراڵییان کرد و دواتریش لەبارەی دیدارە سێ کاتژمێرییەکەیان لەگەڵ ئۆجەلان راگەیەندراوێکیان بڵاوکردەوە.

بەگوێرەی راگەیەندراوەکە، تەندروستیی ئۆجەلان زۆر باشە، ورەیەکی زۆر بەرزی هەیە و بە وردیی هەڵسەنگاندنی بۆ پرۆسەکە و دوایین قۆناغ و پێشهاتەکانی تایبەت بە پرۆسەکە کردووە.

وەک لە راگەیەندراوەکەدا هاتووە، ئۆجەلان باسی لە هەستیاریی ئەو کێشەیە کردووە کە لە چوارچێوەی پرۆسەکەدا کاری لەسەر دەکەن و بە نەشتەرگەریی هەستیار بەراوردی کردووە. ئاماژەی بەوەشکردووە، ئامانجیان لەو کارە، کۆتاییهێنانە بە قۆناغی ئازار و بۆ ئەوەش هەرچییەکیان لەدەستبێت، ئەنجامیدەدەن.

شاندی ئیمراڵی ئاماژەی بەوەشکردووە، ئۆجەلان باسی لە بنەماکانی پرۆسەکە کردووە کە بریتیین لە کۆمەڵگەی دیموکراسی، ئاشتی و تێکەڵبوونەوە بە کۆمەڵگە و گوتوویەتی، لەسەر ئەو بنەمایانە بە ئەنجام دەگەن.

بەگوێرەی راگەیەندراوەکە، ئۆجەلان جەختیلەوەکردووەتەوە، “پێویستە لە هەموو بوارەکاندا دەستوبرد لە هەنگاونان بکرێت و بگوازرێیینەوە بۆ قۆناغێکی نوێ.”

وەک لە راگەیەندراوەکەدا هاتووە، ئۆجەلان ئاماژەی بەوەکردووە، بژاردەی هەمیشەیی ئەو، تێکەڵبوونەوەیە لەسەر بنەمای کۆمارێکی دیموکراسی و کۆمەڵگەیەکی دیموکرات و ئاماژەی بەوەشکردووە، تێگەیشتن لەو “هەنگاوە ستراتیجییە و خاوەندارێتیکردنی، سوودی بۆ هەمووان و تورکیا دەبێت. “

بەگوێرەی راگەیەندراوەکە، ئۆجەلان وەک رەخنەگرتن لە هەندێک لایەنی سیاسیی و میدیا باسی لەوەکردووە، “بە هیچ تەماشاکردن و ئاسایی پیشاندان ئەم بژاردەیە، زیانی لە پرۆسەکە داوە.”