ژمارەی ئەو هاووڵاتییانەی كە لە ناوخۆی عێراقدا فۆرمی ئەلیكترۆنیی خۆراكیان پڕ كردووەتەوە، گەیشتە 37 ملیۆن كەس، وتەبێژی وەزارەتی بازرگانیی عێراق دەڵێ‌، چوار ملیۆن و 601 هەزار هاووڵاتیی كورد فۆرمەكەیان پڕ كردووەتەوە.

بە وتەی محەمەد حەنوون، وتەبێژەكەی وەزارەتی بازرگانی، ڕێژەی بەشداریكردن لە هەرێمی كوردستان گەیشتووەتە 85% كە بەمشێوەیەیە، لە هەولێر 87%، سلێمانی 86%، دهۆك 82% و لە هەڵەبجە لە 89%، بەمەش كۆی ئەو كەسانەی زانیارییەكانیان لە هەرێم نوێ كردووەتەوە زیاتر لە چوار ملیۆن و 601 هەزار هاووڵاتین.

بەپێی بڕیاری وەزارەتی بازرگانی، لە سەعات 12ـی ئەمشەو ئەو پرۆسەیە رادەوەستێت و دەست دەكرێت بە زیادكردنی فۆرمی خزمەتگوزاریی زیاتر، كە بریتین لە زیادكردنی منداڵ و تۆماری هاوسەرگیری و گواستنەوە و راستكردنەوە.