ڕووانگەی سووری بۆ مافەکانی مرۆڤ لە ڕاپۆرتێکی نوێدا سەبارەت بە توندوتیژییەکانی دوو ڕۆژی ڕابردوو، ئاشکرای کردووە کە ناوچەکانی ساحل و چیاکانی لازقیە شایەتی کردەوەی قێزەون و لەناوبردنی بەکۆمەڵ بوون کە لەسەر بنەمای تایفی و ناوچەیی ئەنجام دراوە.
بەپێی ڕاپۆرتەکە، ٣٤٠ هاوڵاتی لە ناوچە جیاوازەکان کوژراون، لەنێویاندا ژنان و منداڵان کە بە شێوەیەکی ڕاستەوخۆ گوللەباران کراون. ڕووانگەی سووری بۆ مافەکانی مرۆڤ بەڵگەنامەی تەواو و ناوی ئەو ناوچانەی بڵاوکردۆتەوە کە تێیدا ئەم تاوانانە ئەنجام دراوە.
ڕاپۆرتەکە ئاماژە بەوە دەکات کە هێزە ئەمنییەکان و کارمەندانی وەزارەتی بەرگری تاوانی جەنگ و پێشێلکردنی مافی مرۆڤیان ئەنجام داوە لە نەبوونی ڕێگرییەکی یاساییدا.
ڕێکخراوەکە هۆشداری دەدات سەبارەت بە مەترسی پەرەسەندنی توندوتیژی دژی هاوڵاتیانی مەدەنی لە سووریا و داوا لە کۆمەڵگەی نێودەوڵەتی دەکات ڕێوشوێنی بەپەلە بگرێتەبەر و تیمی تایبەتمەندی لێکۆڵینەوەی نێودەوڵەتی بنێرێت بۆ بەڵگەنامەکردنی ئەو پێشێلکارییە جدییانەی کە کاریگەرییان لەسەر هاوڵاتیانی مەدەنی هەبووە.
