کازم غەریب ئابادی، جێگری وەزیری دەرەوەی ئێران، ڕۆژی چوارشەممە ڕایگەیاند کە وڵاتەکەی ڕەزامەندی دەربڕیوە لەسەر پێشوازیکردن لە شاندێکی ئاژانسی نێودەوڵەتیی وزەی ئەتۆم (IAEA) لە هەفتەی داهاتوودا لە تاران.
بەگوێرەی وتەکانی غەریب ئابادی، ئامانجی سەرەکی لەم سەردانە، تاوتوێکردنی “شێوازێکی نوێی کارکردن” و دەستپێکردنەوەی پەیوەندییەکانی نێوان ئێران و ئاژانسەکەیە. هاوکات جەختیشی کردەوە کە شاندەکە “سەردانی دامەزراوە ئەتۆمییەکان ناکات”.
ئەم هەنگاوە دوای ئەوە دێت کە پەرلەمانی ئێران لە ٢٥ی حوزەیرانی ٢٠٢٥، وەک کاردانەوەیەک بەرامبەر هێرشەکانی ئیسرائیل بۆ سەر دامەزراوە ئەتۆمییەکانی، بڕیاری هەڵپەساردنی هەموو هاوکارییەکی لەگەڵ ئاژانسی نێودەوڵەتیی وزەی ئەتۆم پەسەند کرد.
بەپێی بڕیارەکەی پەرلەمان، پشکنەرانی ئاژانسەکە مافی هاتنەناوەوەیان بۆ ئێران لێسەندرایەوە.
بڕیاری هەڵپەساردنی هاوکارییەکان لەلایەن ئێرانەوە نیگەرانی ئەمریکا و نەتەوە یەکگرتووەکانی لێکەوتەوە و داوایان لە تاران کرد کە پابەندی هەماهەنگییەکانی بێت لەگەڵ ئاژانسەکەدا.
پەیوەندییەکانی نێوان ئێران و ئاژانسی نێودەوڵەتیی وزەی ئەتۆم لە ماوەکانی ڕابردوودا ئاڵۆزیی بەخۆیەوە بینیوە، بەتایبەت دوای ڕاپۆرتەکانی ئاژانسەکە سەبارەت بە چالاکییە ئەتۆمییەکانی ئێران و زیادکردنی ڕێژەی پیتاندنی یۆرانیۆم.
