لەدوای كۆبونەوەكەی نێوانیان لە كۆنگرەیەكی رۆژنامەوانی هەردو سەرۆكی روسیاو ئەمریكا قسەیان بۆ رۆژنامەكان كرد.

پوتین رایگەیاند، كاتێك ترەمپ-ی دیوە بە “دراوسێ” ناوی بردوەو وتی، ئەمریكا و روسیا، ئەگەرچی ئۆقیانوسەكان لێكیان جیادەكەنەوە، بەڵام دو دراوسێی نزیكن، هەردو وڵات تەنیا 4 كیلۆمەتر نێوانیانە.

وتیشی، دەبوایە ئەم كۆبونەوەیەی لەگەڵ ترەمپ زۆر پێشتر ئەنجام بدرایە.

سەرۆكی روسیا ئاماژەی بەوەشدا، گفتوگۆکانیان لەگەڵ سەرۆکی ئەمریکا، “بونیادنەرانە و لەسەر بنەمای رێزی دولایەنە” بون.

پوتین وتی، بابەتی سەرەكی كۆبونەوەكەیان جەنگی ئۆكرانیا بوە، بۆ گەیشتن بە رێككەوتنێكی هەمیشەیی و درێژخانەیەن دەبێت هۆكارە سەرەكییەكانی جەنگەكە نەهێڵرێن، بەبێ ئەوەی وردەكاری زیاتر لەوبارەیەوە بخاتەڕو.

لای خۆیشییەوە دۆناڵد ترەمپ رایگەیاند، لەگەڵ پوتین كۆبونەوەیەكی بەرهەمدارییان كردوەو بەرەوپێشچونی گەورە بەدەستهاتوە.

وتیشی، لەگەڵ سەرانی ناتۆ و ئەوانی دیكە لەوانە زیلینسكی، سەرۆكی ئۆكرانیا لەڕێی تەلەفۆنەوە قسە دەكات.

ئەوەشی خستەڕو، لە كۆتاییدا بابەتەكە پەیوەستە بەخۆیانەوە دەبێت خۆیان بگەنە رێككەوتن.

ئاماژەی بەوەشدا، تا ئەو كاتەی رێككەوتنێك نەبێت، هیچ رێككەوتنێك لە ئارادا نییە بەڵام بەرەپێشچونێكی گەورە بەدەستهاتوە.

وتیشی، من هەمیشە پەیوەندییەكی زۆر باشم لەگەڵ پوتین هەبوە.

ترەمپ جەختی كردەوە كە ئەوان رێگری لە كوژرانی هەزاران كەس لە هەفتەیەكدا، دەكەن.

ئاماژەی بەوەشدا، سەرۆك پوتین-یش وەك من دەیەوێت بگاتە ئەم ئامانجە.

ترەمپ رو لە پوتین وتی، زۆر بەزویی قسەت لەگەڵ دەكەمەوە، رەنگە زۆر جارێكی تر بتبینمەوە.

پوتین-یش بە ئینگلیزی وەڵامی دایەوە، جاری داهاتو لە مۆسكۆ.

پاش ئەوە ترەمپ لە دیدارێكی تەلەفزیۆنیدا وتی، كۆبونەوەكەیان لەگەڵ پوتین زۆر باش بوەو وتیشی، “شتێكی گەورە” رێگر بوە لە گەیشتن بە رێككەوتن، بەبێ ئەوەی وردەكاری لەوبارەیەوە بڵێت.

ترەمپ وتیشی، 10 لە 10 دەدەم بە كۆبونەوەكە.

هێمای بۆ ئەوەش كرد، ئێستا ئەوە پەیوەستە بە زیلینسكییەوە كە بە بەشداری ئەوروپا بگەنە رێككەوتن.

ترەمپ ئاماژەی بەوەشدا، دەبێت ئۆكرانیا بگاتە رێككەوتن و داوای لە زیلینسكی كرد رێكبكەوێت.