رۆژنامەی “واشنتۆن پۆست”ی ئەمریكی راپۆرتێك لەبارەی باهۆزێكی مەترسیدار لە ناوچەی خۆرهەڵاتی ناوەڕاست بڵاودەكاتەوە و ئاماژەی بەوەداوە، لە سێ وڵاتی ناوچەكە دەدات.
رۆژنامەكە زانیاری لە ئاژانسی بۆشایی ئاسمانیی ئەمریكا “ناسا”وە بڵاوكردوەتەوە و تێیدا ئاماژە بەوەدراوە، ئەو باهۆزەی لە میسر نزیكدەبێتەوە و ناوی “میدیكین”ی لێنراوە، “دەگمەن”ە و رەنگە لە فەڵەستین و ئوردنیش بدات.
باهۆزەكە لەوپەڕی دەریای سپی ناوەڕاستەوە هەڵیكردوە و درەنگانی ئێوارەی پێنجشەممە لە باشوری خۆرئاوای قوبڕس وەستاوە.
رۆژنامە ئەمریكییەكە رونیكردوەتەوە، باهۆزەكە زریان و بارانی بەخوڕ و هەورەتریشقەی لەگەڵدایە و لە ناوچە كەناراوەییەكاندا دەبێتەهۆی دروستبونی لافاو.
ئاژانسی ناسا هۆكاری دەگمەنیی باهۆزەكەی بۆ ئەوە گەڕاندۆتەوە، كە روبەری دەریای سپی ناوەڕاست بچوكە بەراورد بەو روبەرانەی نێو زەریاكان، كە ئەو جۆرە باهۆزانە لەخۆیان دەگرن.
