عوسمان گوڵپی
لای هەموان ڕوونە كە ناوچەكە بەگشتی و عێراق بە تایبەتی بە دۆخێكی هەستیاردا تێپەڕ دەبێت، ڕووداو گۆڕانكاریەكان بە جۆرێكن كە پێشبینی كردنیان ئاسان نیە، ئەوەی تاڕادەیەك ڕوونە ئاڵۆزبوونی دۆخەكەیە بەجۆرێ كە ئێستا ئارامترین ڕۆژەكانی عێراقە، خۆتان باش دەزانن كە عێراق ئەوەی بڕیاری تێدادەدات عێراقیەكان نین !، بوونی دەستی چەندین وڵاتی زلهێز لە عێراق بەتایبەت ئەمریكاو ئێران كە هەردووكیان زیاتر لە عێراقیەكان خۆیان بە خاوەنی عێراق دەزانن، بوونی هەموو ئەو ناكۆكیە مەزهەبی و تایفیەی كە هەیە، وایكردوە تێكچونی دۆخی عێراق لە هەر وڵاتێكیتر ئاسانتربێت.
ڕاستە خەڵكی عێراق ماندووی گەندەڵی و ململانێی ناشەریفانە و كەمی خزمەتگوزاریە، گەنجێكی عێراقی لە وڵاتێكی دەوڵەمەندا بێكارە و گیرفانی خاڵیە، حەقیەتی بێتە سەرشەقامەكان و یەخەی بەرپرسەكانی بگرێت، بەڵام ئەمە هەموو وێنەكە نیە بەڵكو بەرژەوەندیە فراوانەكانی زلهێزان و بونی نفوزی دەوروبەر وایكردوە كە عێراق ڕوو بەڕووی داهاتوویەكی نادیار ببێتەوە و ئێمەش وەك بەشێك لە عێراق ئاسان نیە بەم دۆخەوە نەبینە سوتەمەنی.
ئەمڕۆ و ڕۆژانی داهاتو كاتی كۆبونەوە ئاشكراو نهێنیەكانتانە، بۆیە داواتان لێ دەكەم بەرپرسانە مامەڵەبكەن چونكە دۆخەكە زۆر هەستیارە، ئێوە ئەركێكی قورسی چارەنوسسازتان لەبەردەستایە بۆیە دەبێت زۆر ورد مامەڵە بكەن، چونكە بڕیاری دۆستایەتی و دژایەتی لە دۆخێكی ئاوادا كە لە ناوچەكە دەگوزەرێ ئاسان نیە و لێكەوتەی دەبێت بۆ داهاتوو.
سەبارەت بە ناوخۆش كە كۆدەبنەوە بیرلەوە مەكەنەوە كە چۆن ڕێگە بگرن لەوەی خۆپیشاندان و ناڕەزایی نەگاتە شارەكانی هەرێم، ڕێگا دامەنێن بۆ ڕێگری لە خۆپیشاندان لە ئەگەری سەرهەڵدانیدا بەڵكو بیربكەنەوە كە چی دەكرێت لە ئێستادا بەخێرایی بۆ خەڵكی بكەن تا نەگاتەوە ناڕەزایی، ڕێگای ڕێگری لە ناڕەزایی مەگرنەبەر، بەڵكو هۆكاری ناڕەزایی بنەبڕبكەن، چاكسازی ڕیشەی بەخێرایی دەست بدەنێ و پێداویستیەكانی خەڵك دابین بكەن، ڕێكارەكانی خزمەتكردنی خەڵك بگرنەبەر، لەوە تێبگەن كە خەڵكی هەرێم نیگەران و ناڕازیە بەڵام نایەوێ هەنگاوێك هەڵگرێ كە هەموان باجەكەی بدەن، ئیدی لەسەر ئێوەیە سود لە دڵسۆزی خەڵك ببینن بۆ خزمەتكردنی نەك بۆ بێدەنگكردنی.
دۆخی عێراق نادیارە و ململانێ نێوخۆییەكان بە سپۆنسەری ململانێ گەورەكەی ناوچەكە بەرە و زیاتر دەڕوات، بۆیە هەرێمی كوردستان لە هەموو كات زیاتر پێویستی بە یەك دەنگی و گفتوگۆ هەیە، دەبێت چاك لەوە تێبگەن كە ناكۆكی و دوور كەوتنەوە لەیەك بە زیان بۆ هەموومان دەشكێتەوە،
بەرژەوەندیە شەخسی و حیزبیەكان وەلا نێن و كوردانە و بەرپرسانە بیر بكەنەوە و پلان دابڕێژن، پێكەوە دەست لەناو دەست لە پێناو داهاتوو و پاراستنی خەڵكا كۆببنەوە و یەكڕیزبن.
هەر گۆڕانكاریەك كە لە عێراقدا ڕووبدات كاریگەری دەبێت لەسەر هەرێم، بۆیە دەبێت بەوریاییەوە هەنگاو هەڵگرین و بەدوای بەهێزكردنی هەرێمەكەمانەوەبین، لە ئەگەری هەر گۆڕانكاریەكیشدا ساز و ئامادە و یەك دەنگبین، هەندێك جار خەونی سەدان ساڵ لە گۆڕانكاریەكی خێرادا دەبێتە واقیع گەر بتوانین سود لە كات و گۆڕانكاریەكان ببینین.
ڕاستە عێراق سەرقاڵ دەبێت بە خۆیەوە بەڵام بیرتان بێت دراوسێكانمان چاویان لەسەر هەرێمە و ئەوان بۆ فرسەتێك دەگەڕێن كە بمانگلێنن، بۆیە هیچ كات سەرقاڵ مەبن بەیەكترەوە و هەموو ناكۆكیەكان وەلانێن، شكستی هەرلایەكتان شكستی ئەویترتانە و كاتی یەكتر بەكەم زانین و ڕابردوو فرۆشتنەوە نیە بەیەك، كاتی شەڕی حیزبەكان نیە لەسەر پۆستەكان و تۆڵەكردنەوە لەیەك وەلانێن، گەورەتر لە ڕابردوو بیربكەنەوە، مەسەلەی نەتەوەیەكی ماندووی غەدر لێكراوی قوربانیدەر گەمەی منداڵان نیە كە لە دەستی ئێوەدایە، ئەوەی پێتان دەكرێ بیكەن بۆ تێپەڕاندنی قۆناغی چاوەڕوانكراو و لە پێناو چاكەی گشتیدا هەموو ڕێگاكان بگرنەبەر چونكە ئەوەی بەدوای چاكەی گشتیەوە بێت مێژوویەكی جوان دەنوسێتەوە و بۆ خۆشی سودمەند دەبێت لە داهاتوو، بیرتانبێت نەوەكانی سبەینێ لێتان خۆش نابن گەر نەتوانن ئێستا بە گەورەییەوە بدەنە دەست ئەوان، بە پێچەوانەشەوە دەبنە شانازی ئەوان.
