دان ئازاد: كوردستان ناوچە نائارامەكەی ئازادی كاری میدیاکاران و ڕۆژنامەنووسان دانا ئازاد، ڕۆژنامەنوس و چالاکوانی مەدەنی:لەگەڵ زیاد بوونی ژمارەی رۆژنامەنوسان و چالاکوانان لەهەرێمی كوردستان، ئازادی كاری میدیا بەرتەسك تر دەبێت ئەمەش بوەتە ڕێگر لە بەردەم رۆژنامەنووسان كە پیشەیانە كار بكەن. لەماوەی چەند ساڵی ڕابردوو ژمارەیەك ڕۆژنامەنووسی بوێر لەشار و شارۆچكە جیاوازەكانی كوردستان كوژراون و ڕفێندراون و زیندانی کراون، ئەمەش بەهۆی ئەوەی كاریان لەسەر ئاشكرا كردنی گەندەلی و دەربرینی ڕای خۆیان کردووە یان داوای مافێکی سەرەتایی خۆیان و میللەت کردووە، لەئێستاشدا لەناو زیدانەكانی هەولێری پایتەختی كوردستان چەندین رۆژنامەنووس بەهۆی رەخنە گرتن ماوەی چەندین ساڵە دەستگیركراون، هەروەها بکوژانی ڕۆژنامەنوسە تیرۆرکراوەکان لەبری بەسزاگەیاندنیان لەهەر شارێک ڕەنگێک بووە بە پارێزەریان و خەڵاتی ڕێزلێنانیان پێ ئەبەخشرێت و باڵەخانە دەکەنە دیاری کارە قیزەونەکانیان سیاسەتی حكومرانی هەرێمی كوردستان نەك دیموكراسی نییە، بەڵكو لەچوارچێوەی حیزب و ئامانجەكانی بەرێوە دەبرێت، ئەمەش هەرشارەو بەسەر حیزبێكدا دابەش بووە بۆ دژایەتی و رووبەرووبونەوەی چەند حیزبێك لەگەڵ یەك میدیا وەك فاكتەری سەرەكی ئەو ركابەرێتیە بەكار دەهنێرێت، بەمەش رۆژنامەنووسی لەئازادی كاركردنی خۆی كۆنتڕۆڵ كردووە و لەژێر فشار و ئامانجی حزب ئاراستە دەكرێت و ناچارانە بەو جۆرە كار دەكات. نەبوونی ئازادی كاری میدیا ئاراستەی ئامانج و پیشەی رۆژنامەنووس و چالاکوانی شێواندووە و بەجۆرێك ئاراستە كراوە كە ناتوانێت دەست بۆ دەرخستنی ئەو گرفتانە ببات كە دژی سیاسەتی حزب و میدیاكەی بێت، بەمەش گرفتەكان وەك خۆیان دەمێننەوە چونکە ئامانج و کاری سەرەکی حیزبەکانی دەسەڵات کۆنترۆڵکردنی ڕۆژنامەنوس و میدیاکارە کە بۆ بەرژەوەندی خۆی بەکاری بهێنێت ،ئەوكات رۆژنامەنوس لەو رووە بێ ڕۆڵ دەبێت و هیچ گرنگیەك بەخۆی و كۆمەڵگاكەشی ناگەیەنێت بێجگە لە داواکاریە نا ڕەواکانی دەسەڵات.

PROFILE