وڵات_میدیا #کوردستان

دواى ئازادكردنى هاوپیشەمان گوهدار زێبارى
دواى زیاتر لە سێ ساڵ مانەوە لەزیندان، بەهۆى لێخۆشبوونى سەرۆکى هەرێمەوە ئەمڕۆ هاوپیشە و هاوڕێى خۆشەویستمان کاک گوهدار ئازادکرا، ئەمە یەکێک بوو لە ڕۆژە خۆشەکان کە توانى سوکانیى بەدڵى ستافەکەمان بهێنێت، هەرچەندە تاڵى ئەو ڕۆژانەى گوهدارمان هیچ کات لەیاد ناچێت بەڵام دواجار دەرگایەکى ئومێدى بەڕوودا کردینەوە.
لەماوەى سێ ساڵى ڕابردوودا وڵات هیچ کات گوهدار و هاوڕێکانى لەزیندان لەیاد نەکرد، بەسەختى جەنگا بۆ ئازادکردنیان ئەمە لەقوڵاییى باوەڕێکەوە بوو کە بڕوامان وابوو: سزادانیان نادادپەروەرانەیە، لەئێستاشدا کە هاوڕێمان گوهدار ئازاد بووە ئێمە هیچ کات (شێروان شێراوانى) و هاوڕێکانى دیکەى بەتەنها بەجێناهێڵێن، بەڵام لەڕاستیدا گوهدار لەناو کەیسى هەمواندا ناو و ناسنامەى وڵاتى لەسەربوو.
ئێمە لێرەوە سوپاسى هەرکەس دەکەین بە گوهدارەوە ماندووبونى کێشا، بەئەرکى ئەخلاقى خۆیى هەستا و کەیسەکەى گرتە ئەستۆ، بەتایبەت ئەو پارێزەرانەى کە خۆبەخشانە ژیانى خۆیان بۆ کەیسەکە تەرخان کرد، پیشانى دا مۆرڵى ئینسانیان هێندە بەرزە قیاس ناکرێت.

لێرەشەوە بەدەرفەتى دەزانین، پەیامێک ئاڕاستە بکەین..
وڵات میدیا، وەکو میدیاکى کوردى قۆناغى پێش و پاش ئازادى گوهدار لەڕووى سیاسەتى ئیعلامیەوە دابەش دەکات و هەوڵدەدات لەڕووى سیاسەتى ئیعلامیەوە قۆناغێکى هێورتر و هاوسەنگ تر لەجاران بەڕەچاوکردنى دۆخى کوردستان پەیڕەو بکات، ئەمە ماناى ئەوەنیە ئێمە چاو لە خراپى گەندەڵکاران دەپۆشین و واز لەمافى خەڵک دەهێنین، بەڵکو ماناى ئەوەیە: فۆکەسمان زیاتر لەجاران فروانتر دەکەین لەسەر بابەتە کوردستانیەکان، ڕووماڵى ڕابردوومان بۆ بەشێک لەپرسە کەسى و حیزبیەکان دەگۆڕین.
وەرگرانمان دڵنیا دەکەینەوە، وڵات هەمیشە وەکو سەکۆى ئەو نوسەر و کەسانە دەمێنیتەوە، کە هەمیشە پێگەکەیان بەماڵى خۆیان زانیووە و هیچ بەربەستێکى سیاسیان نەدیووە بۆ بابەتەکانیان، ئێمە و ئێوە بەردەوامین و بەهێزتر دەبین.
وڵات_میدیا
١٧.٢.٢٠٢٤

• تەلەگرامی وڵات بکە بەسەرچاوە بۆ ئاگاداربوون لەخێراترین و گەرمترین ڕووداوەکانى کوردستان وعێراق
  https://t.me/WLLATMED